Plattuladu 2.0, Brig, 9. März 2024
§1 Die wahnwitzigen Wunschwelten des Pad Morelli
Liäbi Ziitgenossuschaft, jetz mal ohni Scheiss. Iischi Epochu watut durch Krisä inemu Sumpf üs Unverständnis und mu Neo-Imperialismus, wa nur Star Wars wirkli vorüsgseit het.
Chriäg, Angscht, Manipulation, Chäfiga, Paternalismus und wider Chriäg, Pescht und Hunger und di Furchtbar Frag im Rüüm:
Was isch d`Moral voner ganz Gschicht?
Äs isch ämal än Hacker-Gruppu gsi, wa mit irnu ghortutu Programm und Maschinä zsämmu inra Art Sitcom-WG läbund. Schii nennunt schich «di Totu Fischa», trotzund du Herüsfordrigä vom Piratu-Dasii und ziähnt ganz grossi Fischa an Land.
Und so henschus hiitu inu Ziitig gschafft: Gruppu vo Hacker und Technik-afinu Aktivischtinnä und Aktivischtu schaffund sus, mit ra zsämmugibaschtlutu Maschinu än arschloch-aggressiv-imperialistischi Gfahr dra z`hindu wiiteri Landstricha in Ruinu-Wiäschti z`verwandlu.
Schi schaffunds z`sämmu mit allerhand Kollegu, Alien-Schmugler, Luft-Piratu-Bandä und mu ur-altu Orakel värässni Chräft az`zapfu, alli Sprengsätz üsser Ärdu z`ziäh und schi tiir ämu intergallaktischu Fiirwärch-Künschtler azdrehu. Hiitu Namittag hensch gat alli Giftstoff üsser Ärdu gizogu, z`sämmu mit du Bäumgmeindschaftä und Chrüüt-Tricker hensch das Ziig eifach üfgsugu, abgsondrut, greinigt und in Tanks abgfillt, fär sus de öi äswo im intergallaktischu Schwarzhandl z`vertiggu.
Blöd gseit, d`Wält isch grettut. D`Chiälini mälchund jetz iru Gfängnisdirketoru und verbringund d`Feriä in sautieru Wellness Hotel, d`Flüchtlinga vertriibund d`vollgikokstu Tyrannu, där Bodu giftut zrugg ind Labors und d`Luft blast d`Schadstoff zrugg ind Industrie-Chemini.
Alli hent äs hüäru Fäscht, d`Abenteurer mächund schich uf Reschini, Wägu und z`Füäss uf d`Landstrass, fär äntli z`läbu und di Püüru und nit Püüru mächund schich an d`Renovation vom Land, wa mit Future-Maschinä und mu neuu Gmeinschafts-Sinn fescht mit appackund, fär das schich gliich alles nu zum güätu wendut.
Jedefalls ziähnt jetz d`Härdä vo igsperrtu frii uber d`s Land, d`Liit verlehnt di Bürotirm und mächund schich ans bauu vonra Wält wa nit zerkiit, mit Liit wasch gäru hent und mit Sachä, wanu ans Härz wagsund.
D`Schaf und Geissä und Reschini, Zrikustiär und Zoo-Bewohner drehund iru Tourä durch d`Landschaft und d`Mänschu wärdund äntli ärwagsu und kümmrund schich drum.
0 Där Witzbold
Mu verchunnt d`s Gfühl, d`Mänschu heigä verlehrt, was schich uf Gschicht reimt.
Äs reimt schich allerhand uf Gschicht. Gwicht, Gricht, Verzicht, än B`richt ubär än Witzbold, wa üsbricht, än strubbä Wicht, wa schich di Täg verhärzlicht und bi schiiner einuzwänzigschtu Prüfig soll d`Wält rettu.
Also, liäbi Mänschu, Tiär und Pflanzä, Pilza, Maschinä, Gäguständ und Fusla iner generellu Orientierigslosigkeit – wennsch nisch nit inär negschtu anderdhalb Stund inra Blüät-Orgiu vo nuklear-Bombä mit allum andru Läbu ufer Wält wäg fägund, de chännwär dem Witzbold bitz züälüägu, wiäners so het.
Schiinä Schattu huscht uber di Gfängnismüüru und z`sämmu mim Diäb verschwinduder, ohni das d`Wärter vom Hochsicherheitstrakt im neo-imperialistischu Gfangunulager äswas derfa mitverchumunt.
Im Märli darfmu alls. Äs isch Träummalu, nit Prässebilder in Chriägsgibiät machu. Äs isch Karaoke und nit TV-Ernidrigung.
Nei, äs Märli darf schich da än Üsziit nä und mal eifach bitz umcha gäugglu.
Iischers Produkt wird ja verchöift als Güät-Nacht-Gschichtji fer Erwagsni und bi Hunger, Chriäg und chranku Wälder bringt doch niämu di Glubscher züä.
Darum, oh, Musen, bitte, gäbät dem Wisch Üfwind zum Fleigu und uf dasser wenigstens paar vonu Züälosundu umhaut, ini Träumwält üs fantastischu Abenteuer, chindlicher Freid vo skurrilu Figurä und mu Gfühl vo Ermächtigung imu inneru Ärläbu…
D`Nacht isch igibrochu und äs wird Still. Alli Liächter sind üs und d`Liit entdeckund äntli wider di Träumwält, wa so lang scho uf schii wartut.
D`s Träum-Garusel dreht und Fantasie-Wäsu trättund üf, inu Geischter vonu Läbundu.
Alls unüsgsprochna, als Färna, alls schönä isch griifbar und di Bilder erschiinund vo leinig, zu Müsig, wa schich nit üfdringt.
House of the Rising Sun
Äs git äs Hüüs am Dalator
Mu seid, äs sii verflüächt…
Und mängä Burscht schich dri verirrt
ufer ewig Süäch…
Zwschtl.
D`Mama het gizäubrut
Und sältu nur älley
Där Papa het gizintut
Fär Gspass und fär Fairplay
Zsämmu hensch än Turm gibaut
üs puurum Elfubey
und irgendswa da obina
heychtär amu Bey
Cyber-Attacka
D`Hackergruppu isch also im Dachstock iner Hammerschmid und miässund äs 200 Siitigs Uberwachigs-Protokoll vo 1977 druch läsu. Än hüäru Chrampf. Alli sind füül inu bequemu Pijama. Zum Glick list`s nu iru Computer vor, oder besser gseit, d` Intelligänz, wa schich durch d`Maschinä mit inu chat unnerhaltu – Schii isch da heikl – und so chännund schich di technisch-afinu Jugendlichu in diversu Liäbesnetz ikuschlu.
Jedefalls miässunsch das losu, äs isch än Üftrag vom Ordu vo Druidu und Bardu – so än anit-imperialistischä Geek Zirkl, wa Games designt – Und där Üfrtag isch klar. Schii sellund, mit allnu värfiägbaru Mittl du Abu vom Gätsch-Donnschtag 1977 rekonstruieru, fär nu de üsz`kundschaftu und z`verstah, was zum Figg da isch abgangu z`Brig… So het`s jedefalls d`s Ordens Miglied gseit…
Zsämmu mit der Bordintelligänz täuchunsch i ind` simuliert Ziitreis, alli sichtlich begeischtrut vo dem üssergwennlichu Ärläbniss.
De sindsch dri. Schi fleigund uber d`s Rhonetal, gitarnt als Tüübä, iner tatsächlich Värganguheit – jedefalls di genau chronologisch Abfolg vo allnu registriertu Abfolgä – wa 1977, im Jahr vom linggu Terrorismus in Ditschland, doch zimli vil Aktä bediitut…
Die Bordintelligänz het sogar so güäti diplomatischi Beziähigä mit du Netzwärch üs Vegl, Ameisa, Pilza und du Bäumgmeinschaftä, Gsteimassiv und Grillä, dasch Züägang uf iru Archiv gäbund.
Es entsteit än vergässni Wält, mit Eggä und Winkla, Mänschu und Müsig, Maschgini und Konfetti.
Aber d`Hacker-Gruppu isch nit zum Gspass hiä, schii siind am Schaffu. Uberwachig. Äs geit um än Schüälbotsch, wa wägu schiinu Konzärtbsüächa und Piratu-Sendigä uber d` müsikalischu Vorliäbinä inu Chällär-Beizä ins Faduchritz voner Gheimpolizii isch gigratu.
Also där Schüälbotsch het scho öi nu meh Dräck am Stäcku, aber das chunnt de spetär. Wil di ganz Gschicht isch scho nu kompliziert.
Schii landund ufu Tächer vom Hublstadtji aner Saltina.
Tatsächli wird gat äs grossus Dossier vom Ghemdienscht ind Simulation igspiesst und än Verbessrig vo Ton und Bild fliässt uber d`Simualtion, was d`Atmosphäre nu lebendiger und detaillierter laht lah erschiinu.
Wenner öi wellt wissu, was d`Hacker uberu Schüälbotsch üsafindund, de täuchät i, in di Wält, geht uf d`Süäch nahm Witzbold und leht chä nit lah üfhaltu.
Nur nu epis, wa vilii nu wichtig isch z`verstah. Äs het än grossi Konfusion im Fall Schüälbotsch gigä. D`Agäntu hent epis falsch verstandu. Wil inu Brichta immer vom Pad Morelli d`Red isch, hensch intensiv und mit lächerlichu Higab alls dra gsetzt, du Pad Morelli z`fassu.
Fär chä du peinlichu Umwäg vom Gheimdiänscht z`ärsparu, hiä än meglichscht verständlichi Erklerig.
§2 D` Sach mim Pad Morelli.
Fär sus nit lang spannund z` machu; Du Pad Morelli git`s gar nit.
Är isch ärfundu. Ärfundu vonemu glängwiiltu Schüälbotsch, wa schich durch d`Schüäljahr 1976-77 kämpft und anstatt mabu fär schiini Prüfigä z`lehru, d`Wält vo schiinum Held erträumt, schich alli Details vorstellt, schi heimlich zeichnut, aber immär enttüüscht isch vom Resultat.
Är probiärt mit chraglschrift d`Figur z`beschriibu, aber äs tehnt immär kacke.
Und immer wenner schiinu Kollegu äntli wider gseht, schnurrdär nur uber das und alli gehnt mu üsm Wäg. Darum erklehrdärs eifach flüschtrundu schich sälbsch…
Inär Vorstellig vom Schüälbotsch isch där Pad Morelli än Parodie vonemu typischu Film-Held, wa eigentlich nur trüürig isch, dass alli schiinu Agcheerigu gstorbu sind.
Und darum liggt öi d`Wält vom Pad Morelli im Stärbu. Alls verfüült, zärkiit, zärbricht und är müässus ärträgu. Där Schüälbotsch het darmit äs Monster wellu schaffu, wa öi mit Sympathie-Pinkt nu gruslig isch.
Wil är isch, fär sus mide üsztricku, scho än rächt unüsstehlichä Typ mit Meinigä, wa Diini Oma scho uberholt findt…
Di Ziit vom Pad Morelli isch verbii. Schiinä Humor chunnt nimmä a, schiis Coboi Kostüüm zerkiit und d`Liit sind mu alli mindestens so fremd, wiä är inu isch.
D`Wält vom Pad Morelli isch äs Sammelsurium üs Horror-Vorstelligä, wa där Schüälbotsch erträumt und will bhaltu. Insgeheim heder scho mal gideicht, dass d`s Läbu langsam ischlaft, ab so vil Schmärz und verteiftu Wundä, dassus keis zrugg meh git vorum ewigu Träum.
Där Schüälbotsch deicht furchtbar voner Wält, het d`s Gfühl, dass d`Mänschheit am Abgrund steit, dass di Grossmächt und Konzärna eifach wider di gliich Schiisa wärdund abziä wiä susch öi immer, d`iisern Füüscht wider laht lah herrschu und iru Ziel mit allnu Mittl wellund erreichu – bis ins Jenseits…
Där Pad Morelli isch also än Art Antwort ufu Weltschmerzt vom Schüälbotsch.
§3 Där Alltag vom Pad Morelli
Beesch gseit macht där Pad Morelli eigentli gar nix. Är het als jungä Spörtler chännu in ämpaar Western mitspilu und het de wiä gseit schiini ganz Famili an Lunguchrebs verloru.
Siithär besüüft schich där Pad Morelli eifach där ganz Tag als Coboi verchleidut uf schiinum Barhocker im Tenne und trüürut där verlornu Ziit hinina nah, im Hewstock, wa abgibrunnu isch, im Wald, wa chrank am umkiiu isch und im Ermitage, wa scho lang züä het…
Trotzdem schreckt`s nu vo Ziit zu Ziit vo schiinum Barhocker und äs bliibt an schiinum Stifl chläbu, d`Wält z`rettu.
Das isch fär inu astrengund und miähsam und d`Ärinnrig dra willär immer so gschnäll wiä megli imu Piär-Glas ärtränku.
Wenner müäss pennu oder ässu, ziähtär schich gäru mit andru Comic-Figurä inän abglägunä Winkl vom Pfyywald zrugg. Da hensch iri Rüäh voner rauu Wält und läbund inra Art Bäumhittu-Räuber-Camp-Sitcom-WG z`sämmu und isch da eigentli öi nur am Laffu und am Spilu.
Entschlossu röchludär zwischu Barhockär-Sitzigä dum Rottu entlang, mobilisiert schiini Mitstriitundu und chnüpft schich korrupti Sherriffs, asoziali Bänker, beeschi Eltru und sälbschherrlichi Lehrer vor…
Verfolgt vo allnu Schichtä vo schiiner Ziit, wiler bi allnu nur Scheiss macht und darmit Polizii, Chorvereina, Gläubunsgmeinschaftä, Fassnachts-Brüäderschaftä, Obskuri Ordu, Schützuvereina und Chopfgäldjäger aziäht, wanu wellund üslifru, tot oder lebendig, ischär mim Arsch uf schiinum schlätter-Pfupfji stets ufer Flucht vorum Gsetz, dum Tod und jeglicher Värpflichtig.
Aber ganz wenigi, vor allum di beschtu Kollegu vom Schüälbotsch, fiäbrunt mit, mit dum Pad Morelli, wa ufu Zeichnigä und im Gflüschter immär meh afaht läbu.
§4 Där Gätsch
Abär du Pad Morelli z`kennu isch nit so schwirig. Är isch relativ eifach gstrickt. Är isch ja öi ärfundu. Schwiriger wird`s bim Schüälbotsch.
Där Schüälbotsch lüägt du Wolkä nah. Är gseht wiesch schich vom Wind lehnt lah d`s Tal embri schrecku, immer wiiter, bis zum Meer…
In denu Momänta wehridär gäru än Wolku. Schiinä Gränggi-Körper chat schich nit vom Wind lah triibu. Nei, der müäss hiä sitzu bliibu.
Äs Stuck Chriidu trifft nu hert am Chopf. D`s Klassuzimmer lacht, där Lehrer nit. Der isch schwii verrucktä.
Är riibt schich d`Stell, wa d`Chriidu het igschlagu und flüächt bitz umänand, bis där Lehrer nu üsm Zimmer zum Räkter zerrt.
Und de gsehdär nu. Währund där Lehrer mit gschnällum Schritt du Schüälbotsch wäggschreckt, lüägt der äs letschts mal üsum Feischter und chat`s sälbsch fasch nit gläubu. Abär är gseht nu. Är heicht aner Sunnu.
Där Narr, där Tubl, där Nol, där Pfiifär, där Cloon, där Spinner, där Tropf, heicht amu Tschaagu vom Himml, lest schii und kiit in di Gassu.
Äs isch Gätsch Donnschtag, 1977. Ganz Brig isch ufu Bey, tanzt inu Chällini und inu Beizä räukundu zu peinlichu Volks-Müsig-Hymnä oder Funk und Disco Sound und vilii äswo im Unnergrund mit Rock, Jazz, Blues, Metal, Reggae, Punk und wasus halt alls so z`losu het gigä inu spatu Sibzger…
Jedefalls nimmt`s där Schüälbotsch in der Sach genau. Är will wissu, was fär Sound läuft. Är gseht schich als Gonzo-Müsig-Redakter vo schiiner eigund Radio-Statio und gseht du Gätsch als wichtigs Forschigs-Fäld fär Müsig-Liäbhaber-Tendänzä vo schiiner Ziit.
Där verträumt Schüälbotsch isch än 17-jehrigä Blazer, wa schich nix meh ufer ganzu Wält wünscht, als Schafjini verchleidut mit schiinum Kollegji im Gätsch d`Nacht durch z`machu.
Äs isch iru Chance bidu coolu Kids z`landu, bevor schich de in ämpaar Jahr alli uf d`Unis verstreuund, inu Städt jenseits voner Bärgwand, wa alli in coolu WGs exotischi Formä vo Liäbi und Rüüsch entdeckund.
Där Räkter lüägt nu a und seit är sellä erkleru, warum där Lehrer nu z`im gschickt heigä.
Där Schüälbotsch bringt keis Wort vircha. Är lüägt scho wider üsum Feischter. Das heder scho als Jungi. Darfer heder de sogar in Bhandlig därfu und Pillä vercho.
Schii hent mu gseit, är sellä nit umchaträumu und trödlu, abär är weh trotzdem liäber forna am umchatrödlu gsi. Är wellti Liit träffu, intressanti, verruckti, lebendigi… Eml im Summer. Und im Winter wehrider öi liäber susch eswo, wa in denu vo Pubertät und Schiin-Seriosität geprägtu Klassuzimmer.
Wenner jetz würdi verzellu, är heigä än Vision ka, vomu Typ inemu Narru Kostüm, wa aner Sunnu het ghangu und de ini Gass isch kiit, de würdi mu där Räkter gat än Zwangsjacku uberstülpu.
Das würdi mu niämu gläubu, darum verdrängters meglichscht und seit; «Differänzä.»
Abär är het`s gseh, durch d`s Feischter, wiä där Närr z`mitsch ind Maschgini und Guggumüsigä, Chotzetä, Gspass und Liäbi isch kiit, grüsig noch näbu schamlosum Hemmschwellu-Uberträtu und allu andru Schrecku voner agitrüüchunu und agmaltu Stadtmeutu.
Und jetz, waner bim Räkter hockt und der nu gat z`sämmuschiisst, gsehdär dur d`s Feischter, wiä där Närr uf du Tächer umänand Chlättrut, schich mit ra Fläschu darliggut und afaht, du algmeinu Grüschpegl mit schiiner Lauta z`betupfu und derbii komischi Atmigsiäbigä oder soswas, mit Affuähnlicher Mimik und irgendwiä genialu Dance-Moves abz`ziäh.
Äs letschts Mal lüägt är üs, wie di Beim tanzunt und d`Vegl schich lehnt lah gah, im Zug gägu Weschtu.
Und in schiinum Chopf ertehnt äs Liädji:
DÄR FELSIG WÄG UF SITTU – Pad Morelli
Vers 1
«Üfgibrochu ganz älley,
In d` Färni het`s gizogu
Mit knapp nu fufzä Stey
Än Namu miär ärlogu
Vers 2
Dum Perli tschönä gseyt
Där Mera bravi gschworu
Äs Bierli oder zwey
Äs vieille-prune nur zum Chorru
Bridge 1
Und de ferdirr ferüss
üsum Eltruhüüs
eifach mal grad üs
Druf los ämbitz gah ggorru.
Bridge 2
Und d`Meytjini va Leygg
Sind halt jetz älley
Ich stampfu voller Freyyd
Bridge 3
Ufer Landstrass näbum Rottu
Där Häuptstadt züä, Hurrah
Refrain 1
Schriit där Wägg uf Sittu
Tritt fer Tritt verab
Mim Rottu aner Siitu
Schritt fer Schritt vora!
Vers 3
Dur du näbeligu Sumpf
Ind Wiiti ohni Segl
Z`Varu scho versumpft
Jetz pleite und nit hegl
Vers 4
Du ghorntu ubertrumpft
mit gheychtum hochum Pegl
D`Freyd scho lang versummt
Jetz losi nur Du Vegl
Bridge 4
Und chumu nit zer Rüäh
Und weiss nit wiä mu tüä
Ich lahsus eifach züä
Ich cha mi nimmä mottu
Bridge 5
Und alläs Leida gat gcheert
D`Wält isch so vercheert
Miis Härz isch so erschwert
Bridge 3
Ufer Landstrass näbum Rottu
Där Häuptstadt züä, Hurrah!
Refrain 1
Schriit där Wägg uf Sittu
Tritt fer Tritt verab
Mim Rottu aner Siitu
Schritt fer Schritt vora!
Vers 5
Bri uf Salgesch bini chu
Ha ghofft uf paar Kollegu
Vo wellum bisch de Du?
Hänsch mi afa fregu.
Vers 6
D`Falschu mi vernu
De Hensch mi afa jagu
gezinntut han schi nu
gedroht hanschi z`verchlagu
Bridge 5
Was willt de Du hiä sii?
D`wilti Ziit verbii
D`s Bild än Schwiinerii
ich weiss nimmä wa lüägu
Bridge 6
Schii mächunt mi ganz chley
Und einä stellt mär d`s Bey
Jetz bini ganz alley
Bridge 3
Ufer Landstrass näbum Rottu
Där Häuptstadt züä, Hurrah
Refrain 1
Schriit där Wägg uf Sittu
Tritt fer Tritt verab
Mim Rottu aner Siitu
Schritt fer Schritt vora!
Vers 7
Mit Schmärzä zu miär cho
Kollegu hent mi gfunnu
Jetz bini wider froh
Äs schiint eu wider d`Sunnu!
Ätnli is verbii
Jetz chanis wider gniässu
Teilät Brot und Wii
Niämer soll hiä schiässu
Vers 8
So läufäwär grad üs
Findä iischä Pfüüs
geyt ja nur grad üs
Je länger, je meh Nasä!
Und d`Fahnä iner Hand
schriitä wär dur d`s Land
Fär Füässball, Hand in Hand
ufer Landstrass näbum Rottu
Där Häuptstadt züä, Hurrah!
Schriit Där Wägg uf Sittu,
Tritt fär Tritt verab
Mim Rottu aner Siitu
Schritt fer Schriit, vora…
§ 0.5 Halbziit
Där Schüälbotsch und schiis Kollegji sind also an dem Abu üsum Internat üsgibrochu. Fär schii is aber meh gsi. Schii sind üsgibrochu üs irum Läbunszüästand, üser Dominanz vo strengu Erwagsnu und sadistischu Grossu, üsgibrochu üs dum Gfängnis vo denu, wa eim immer d`s Läbu schwerer mächunt, als dassus eigentli miässti sii.
Schii wissund, hinner inu liggut d`Wält vo denu, wa meinund, schii miässä andri erziäh, wilsch iru Art nit verstehnt. Di Konsequanzä fär abz`hauu sind ganz furchtbar, abär är verdrängt denu Teil vo schiinum innru Monolog und schiis Kollegji allum Aschiin nah öi.
Schii leeschund iru miässum üfgitribu Guttra und trennund schich, fär iru jewiligu Liäbschtu gah abz`holu.
Där Schüälbotsch schliicht di Biela ämbrüf zum Püüruhof, wa d`jung, nätt, härzig, abenteuerlich Tochter vom Püürli schich äbufalls het üsgschlichu…
Ufra Mattu mit üsblick uf d`s Fäscht tischtär äs z`Nacht uf än Picnic Dechi. «Wuaw, het`s gchocht.» seitsch und är nickt.
Abär trotz irnu enormu Fähigkeitä, alli Gfahr und Spannig üsz`blendu, wissunsch… Irgendswas isch da nit ganz koscher in dem Gätsch da unina.
Bitte chleinä Applaus färu Märu
Im färnu, dröhnundu Städtji ligt än Spannig iner Luft, als stehgä alli unner Strom. Das Gfühl isch in dem Momänt d`s einzig gmeinsam Terrain vonu vilu Liit, wa da uf der Chartu am wandlu sind.
Di diversu Gruppä vo desillusioniertu Jugendlichu gniässunt näbunand iru Rüüsch und wärdund in allerhand Szenä gizogu. Zär gliichu Ziit sammlut schich ufer andru Siitu vom Rottu än Schar Gstaltä a, mit Metzgermesser und Grillgablä het schich än Gruppu üs indoktriniertu Fanatiker, Para-Militärs und jungu Arschlecher in schwarzu Robä und Spitzhüübä versammlut, fer mu konservativu Kardinal züäzlosu, wiäner gägs Gätsch gätscht.
Chritzi, Galgubalkä mit agheichtu Galgusträng, Biältini, Geisslä, Hewgablä… Eifach alls wasch gfunnu hent hensch ini Plampä gnu, fer där Hordu vo Maschgini än Abriibig z`verpassu.
Där Journalist gseht das alls.
Är isch gat mim letschtu Zug üs Bäru z`Brig acho und müäss z`mitsch dur d`Meuta bis zu schiiner WG cho. Är weiss, dass vil Liit da sind, waner scho lang hengi sellu wider gseh, aber het z`Bäru iner Gartubeiz vor schiiner Freundin gross giplöfft und gseit, är gegä eifach in schiis Zimmer, gschliässägi di Port, tiägä paar Orupax dri und gengi de üsgschlafu und kompetänt am negschtu Morgu gah schaffu.
Abär där Journalischt, wa z` Mitternacht äntli di Zugfahrt uberstandu het, gseht än Reiha Fakl-haltundär Spitzkaputzä, wa zsämmu latiinischi Versa stammlund.
Äs git nur ei Wäg. Heimgah.
Är isch totkaputt und müäss am negschtu Tag nu weiss nit wevil fertig vercho… Tonbänder abtöggelu, Texta Korrekturläsu; fär so Ziig müässer där Grind bider Sach ha. Und wenner alls schafft, chaner wenigstens am Friitag und am Samstag mim Fredi z`sämmu als Hännä verchleidut duru Gätsch heglu.
Riders on the storm
Am andru Endi voner Stadt, im Flussbeet voner Saltina, hent schich di Pfyyräuber, also där Pfupfji Verei, wa alli längu Fingra teif im Drogugschäft badut, äs Lager üfgstellt.
Iru Mitglieder schwankund dur d`Liit ufer Süäch nach Rüüsch und Striit.
Eis vonu Mitglieder seikt gat ani Port voner WG vom Journalist. Der gseht du picklig Rocker vo wiitum und het kei Luscht uf Diskussionä. Also versteckt är schi äswo im Busch.
Schiini Freundin het mu gseit, är sellä meh schiini Atum Iäbigä machu. Mit dum Härz voll Sehnsucht piischtudär da inu Stüüdä. Aber nix da. Nada. Kei Rüäh, kei Pause. Nur Horror
Är probiert ganz fescht an nix z`deichu, dass sigä z`wichtigschta. Aber immerzüä blaagundu di Bilder vonu Facklä, vom Seik an schiiner Hüüsport, vo schiiner üswägslosu Situation, iner Chelti, im Busch schiinä inner Fokus…
Aber de gcheertär äs Liäd und döst z`mal unverhofft i.
Pause
Aber zum Glick gits du Tubl, also där Närr, der, wa ini Gass isch kiit. Där Schüälbotsch het nu ja gseh. Waner am Namittag het üsm Feischter glüägt, heder gseh, wiä schich d`Schlinga umu Chnöchl vom Tubl het glest und de di ganzi Gstalt ämbri im Gätsch isch glandut.
Und jetz gsehdär nu wider. Där Schüälbotsch, wa mim Püüru Mejtji am Arm teifi Gsprächi uber Sälbschtbestimmig fiährt und verschwiigt, dass schiini Eltru nu wellunt ins Chloschter schicku, beugt schich üf und gseht nu wider.
Där Nol, aner Spitza vonra Gruppu Liit, wa inu schönschtu Chleider und wunderbarschtu Grüch summund uberd Mattu tänzlunt, mit chleinu Pfiifjini und Schirma, Schäl und verrucktu Sunnubrillä, ins Tal embri richtig Gätsch.
D`s Abenteuerer-Mejtji zieht nu ufdi Bey, schittlut iru Rock und stimmt begeischtrut in di Grüüschi vom Umzug. Där Tubl, wa mittlerwiilu scho ufum Niveau vomu Gäugler flötut, fiährt di Zäuberer, Königa und Königinnä, Sanitäter mit Mültini, Wägu mit Näschti und Verpfelgig üs allnu Winkl vonu Bärga ämbri ins Tal, fer mit magischu Tüüschigsmanöver di bevorstehunt Katastrophu z`verhindru…
Där Schüälbotsch chats fasch nit gläubu, aber där Umzug üs Chärru, bepackt mit Rummlmaschinä und Spilzig, Kostüm und exquisietu Mänschu und Tiäri, Pflanzä und Gwürz zieht fascht unbemerkt dur d`Innustadt, schiini abenteuerlich Gefährtin het nu uf än Wagu mitgschreckt, wasch in bequemu Chischini näbsmu göttlichu Gitarrischt vonra Wasserpfiifu ziähnt.
Waldmejtji
Währund dessi isch där Journalist scho fasch erfrohru. Är isch uf schiner Mappu va barrer Erschöpfig igschlaffu. Vil z`lang isch där Pfyyräuber im Hof umcha gitorklut und het Zig kaputt gschlagu.
In schiinu chaltu Treim gsehdär schiini Freundin, schii isch schwanger und het z`chalt und är probiert värgäblich schii z`wermu.
Där Gäugler, wa fer än Besprächig zär Sehäri inu Wagu isch gstigu, gseht nu, du Journalischt und stiigt bis zum Zäuberer. Är seit mu: «Mach äs Wunder. Susch isch d`s Gschichtji trüürig.» Und secklut dur d`hegl Meuta bis zunu Bisch vor där WG.
Där Journalist het scho ganz helli Lippä und mag fasch nit üf. Där Sanitäter bindut nu inen Dechi und heicht nu uber d`s Mülti. De gehnsch zrugg zu iru Liit.
Und de gsehdär än Mariu Figur, am Bärg, schii schiint ganz hell und är mag äntli schiini Rüäh findu.
Abär fär d`Mariu-Erschiinig git`s än rationali Erklerig. Där Härzkönig, wa schiinä Riichtum mit där Seheri teilt het mit där Härzdam, där Madame vom Freuden-Etablissement vo Brig äs Mariu Kostüm agleit und schii amu Seili uber di Klippu gschwungu, aber sehr sanft. Und är het schii sehr härzig gfregt und schii het wirkli Freid ka… Jedefalls hent di Zäuberer so chännu du Mob üs spitzu Kaputzä derfa chännu abhaltu, äs Blüätbad az`richtu.
Statt mit iru Grill-Gräti uf d`Fäscht-Meuta losz`gah, chneiwund di alli flännund vor du Jungfrauu-Statuä vo Natersch und gehnt bald alli im Fridu heim z`irnu Liäbu. Summi sogar bitz zum färnu Krach tänzlunt.
D`s frisch Paarli vo iischer Gschicht, also där Schüälbotsch und d`s Abenteuer-Mejtji gehnt mit mim Zug, dum Rottu entlang bis uf St.Maurice, de am Gänfersee entlang uf Frankriich, bis ans Meer, de ufen Dampfer und wider zurgg uf Gletsch.
Där Schüälbotsch, wa um eis Haar hengi miässu Pfarrär wärdu, het schich als Schafpüür mitra Kommuna in Südfrankriich abgsetzt, schiini spetär Fräu isch ini Politik und verteilt da mit Zahlä und Argumänt du Füülu und du Gchöiftu Arschtrittä mit Schmackes.
Där Journalischt isch bider Seheri im Wagu üfgwacht. Schii het mu paar güäti Gschichtä gsteckt. Där Pad Morello het schich lah umschüälu und schafft jetz als Physio Therapeut fer Ross. D`Hackergruppu het schich gat än neui Konsolu gchöift und zockt gat heiter inän frii Wuchu
Und wennsch nit gstorbu sind, läbunsch im Fridu mit där Umwält, du Mänschu und du Tiäri, du Pflanzä und Pilza und Mikro-Organissmä und beschützund d`Schutzlosu, bemüättrunt d`Müättärlosu, losund du Verzeller und verzellunt du Loser.
Und de, mu gcheerts fasch nit, entsteits…
ZUGABEN:
Spinnu und Fleigu
Mit dumpfum Chlopfu prellt schiinä Chopf uf d`s betoniert Trottoir vorum Club. Där Securitas het schiinä Gspass ka, het äntli schiis Krav Maga amu hilflos heglu Tubbl chännu üsprobieru. Niämer het züäglüägt, niämer het`s gseh, abär äs tüät hiitu nu weh.
Du Vorfall sälber heder värgässu. Abär siithär spinndär. Also schiinä Grind. Jedä Tag wachtär üf inra neuu Wält, weiss nix meh so rächt und vergisst alls zimli gschnäll. Är versteckt schich vor du Liit und beschäftigt schich nur nu mit schich sälbsch.
Schiinä gschopplut Grind isch voller Bilder, voller Gsichtär, voller Chnäll, aber ohni Halt, ohni Bodu. Di Gedankä verstriichunt inerä gränzulosu Wiäschti üs nix und bitz epis…
Än Kaktus ziäht schiinä Schattu uber d`Wiiti, än trochni Strüüchballu rollt umänand. Nix wirkli intressants, wa schiis Deichu schich chännti feschtmachu…
Und so ischer zum Streuner wordu. Inu Innustädt und duri Bahnhofstrassä und ufum Land dur d`Wälder ziäht är, ohni wirklichs Ziel, im Zug vom Wind, fer irgendwelchu vermeintlichu und andru Zeichu nah z`jagu.
Lang ischer eifach gwandrut. Ämbrüf, ämbri, rundum und grad durch…
Uf schiinum langu Wäg heder inu Beizä gspilt, inu Parks und Unnerfiährigä, inu Unnerständ und unneru Briggä…
Und de ischer eis Tagsch ämu Zäuberer uberu Wäg gluffu. Än altä Ma mit lengum, wiisum Bart, mu Hüät und mu Stäcku, wa anrä Pfiifu ziäht und du Räuch wiä in Ziitlupa uber zunu Wolkä blast.
Där Spinner isch näbs inu gah hocku, äswo iner Gass und het nu agsprochu;
«Salü. Ich weiss nimmä wiiter. Alls verstriicht im Nix.»
Där Zäuberer het das zimli drusgibrungu. Richtig hässig hädermu entgägnut.
«Du häsch gat miini geistlich Reis unnerbrochu, zwischu Härz und Zungu. Ich weiss doch eu nit wiiter…»
Dum Spinner het`s leid gita und fär schich z`versöhnu heder gseit; Ich channter äswas vorsingu, wennd willt. Miini Mer het gmeint, das hälfä immer…»
Das heder gmacht, güät gmacht und äs het mu sogar güät gita. Där Zäuberer het z`mal ganz andersch ind Wäsch glüägt, richtig luschtig…
Und so hensch agfangu z`sämmu dur d`s Land z`striichu. Uber d`Hubla und dur di Täler, zunu Seeä und Quellä voner Wält.
Inu Beizä sindsch z`sämmu üfgiträtu, vor du Herrschundu und vor du Pflegundu und vor du Liäbundu…
Di Süäch het nu zumu Schloss gibrungu, wa schich Strassu-Chinder voner Umgäbig hent ignischtut. Är isch akzeptiert wordu, het därfu mitspilu und het schich sehr wohl gfühlt.
Är het sus alls mägu niderschriibu, malu, zeichnu, dichtu und deichu. Är isch nu nahgangu, du Zeichu.
Jedä Tag ischer üf und mit Hilf vo schiinu Zeichnigä und schiinu Plän is mu jedä Morgu wider z`Sii cho. Är het`s afah verstah und isch immer wider zrugg zum Schloss, in schiini Wärchstatt, fer da schiinä Chopf darzstellu, schiini Wärchi üszstellu und schiini Wärta festzstellu.
Aber wenner mal wider agwandrut isch cho, vo irgend so mu Isatz, hent d` strengu Ritter d`s Schloss scho gstürmt ka, alli Sachä vonu Strassuchind verbrennt und inu und schiini Freunda vertribu.
Siithär läbtär ällei, verborgu, und spinnt.
Schiis Wärch zerstört, schiinä Geischt gspaltu und värbrennt kiidär zrugg in d`Ungwissheit, wacht wider üf inra fremdu Wält und erschöpft schich de biser wider ischlaft.
Nur mit där Müsig chaner nu fleigu. De chunnt alls zrugg, üsu Archivi vonu Härzu und uber d`Sendigä Zungä chämmund d`Erinnrigä zrugg zär Melodie und Rhythmus, was brüücht fär äbz`häbu, in schiinum Luftschiff, und scho mager sus alls wider verzellu, gitreit vom Wind, verbindudär schich mit allum flüchtigu, fär mu än Stimm z`scheichu.
Aber jetz chunnt der Ton nur nu üs dum Pfeischter vom Dachstock vonemu ganz verrucktu Hüüs…
Willy Williams, Privatdetektiv
Där Willy Williams hockt in schiinum Büro und längwiilt schich.
Mit du Tschaagä ufum Tisch balancierdär ufu Hinnerreder vo schiinum Büro-Stüäl und nippt amu Glas Vieille Prune.
D`Flaschu heder bim letschtu Üftrag gscheicht vercho.
Imu weh liäber gsi, schi hengi nu gizalt. Är het eigentli vorka bitz z`brämsu mim Laffu…
D`s Vreni Prumat heder sellu süächu und het schi immerhi öi gfunnu… Im Tenne. Als Häupt-Act unnerum Kunscht-Namu Natacha. Där Securitas het nu vermöblut, d`Eltru vom Vreni nit chännu zalu und schiinä Grind surrt siithär zimli…
Mit dum Gäld hengidär chännu schiini Härzuns-Damu gah bsüächu, wa aner Zürcher Hochschüäl fer agwandti Wissuschaftä än Stell agiträtu het.
Trotzdem is verdacht güätä Schnaps…
Mit mu völlig unärwartutu Schwung lädruts nu schliessli ufu Bodu, d`s Fitlu zersch und de scho wider där Grind, d`s schön Glas zerspringt und där fein Schnaps landut mu uber där frisch greinigt Chleidig.
«Schiesse…» Verwirrt steidär üf und lüägt umenand. Äs liitZum zweitu mal.
«Chumu!» briäldär und wischt mit mu Stoffnastüäch uber d`s Hemli und di Crawatt.
Är macht di Port üf und lüägt ämbri uf än sehr chleinä aber energie-gladtnä Glatzchopf.
«Williams, nimmi a!»
«Nei, vieille prune…» murmludär.
«Hä?»
Där Privatdetektiv isch nu nit ganz vom Sturz ind Realität zrugg und isch gar nit iner Stimmig fär ärnstä Bsüäch. Är lüägt mit ra Mischig üs Entsetzu und unagribrachtär Griährtheit dum chleinu Ma ind Äugu.
Der bahnt schich sälbsch du Wäg ins Büro und macht kei grossi Umschweifa.
Är klatscht äs Dossier ufu Schriibtisch und seit: «Ich ha Chä das wellu persönlich ubergä. Vogler isch miinä Namu. Ich mäldumi in ämpaar Täg. Ich erwartu völligi Higab fer dischä Fall. Uf widerlüägu.»
Där Williams nickt nur, wiä än ertapptä Schüälbotsch und nimmt d`s Dossier seufzund ind Fingra.
Zwei Stund ischer fiinä gsi, biser äntli zum Schluss isch cho. De ersch heder d`Schärbä wäggwischt, schich äs neus Glas üsm Schaft gholt und schich mit mu Cigaret uf du Balkon gstellt.
Är packt schiis Diktiergrät und trickt ufu rotu Chnopf.
«Fall 23, üfgnu April, vom Herr Vogler.
Vermissti Person, jungi Frau, z`letscht gseh in Gänf mit ämu russischu Diplomat. Verdacht uf Entfiärig, fär Druck uf du Vater üsz`iäbu. Der isch Chef vomu grossu Energiekonzärn.»
Fortsetzung folgt…